IMQ Analisi Klinikoak konpainian hiru eguneko greba deitu dute lan-baldintza txarrak dituztela salatzeko. Lehendabiziko lanuztea ostegun honetan egin dute eta jarraipena % 70ekoa izan da, ELA eta LAB sindikatuek jakinarazi dutenez.

«COVID-19aren garaian txalo egiten ziguten. ‘Zuengatik ez balitz, ezingo genuke aurrera egin’, esaten ziguten, eta orain hau egin nahi digute. Eta prest ez dagoen jendea sartuko dute gure ordez». Mari Carmen Regueirok (48 urte) ez du ezkutatu haserre mintzo dela. 17 urte daramatza garbitzaile lanetan IMQk Bilbon dituen kliniketan, eta hilaren 31n kontratua etengo diote. Haren ahizpa Sarak 53 urte ditu, eta hark 27 daramatza IMQn. «Erretiroa hor hartuko nuela sinetsita nengoen. Kolpe gogorra izan da; gure lankide bati bihotzekoak eman zion, eta zaintza berezietan egon da. Litekeena da dena epaitegian amaitzea, eta buelta ematea espero dut. Subrogazioa horretarako dugu; nik lau garbiketa enpresarentzat egin dut lan IMQn».

IMQk kaleratu nahi dituen 90 garbitzaileetako bi dira Regueiro ahizpak. 85 emakume eta bost gizon dira, eta askok hogei edo 30 urte daramatzate bertan lanean. Abenduaren 31n amaituko da Gizatzen enpresarekin duen akordioa, eta garbitzaile propioekin hasi nahi du. Haiek trebatzen hasia da dagoeneko. «Esaten dute ez garela egokiak, gaixo baimen asko hartzen ditugula, garestiak garela… Garestiak? 1.040 euro irabazten ditugu, gehi epaitegian irabazitako gehigarriak. Pentsa, 2021era arte arrisku plusa ukatzen ziguten. Garbitzaile berriak horrelako eskubiderik gabe sartu nahi dituzte», azaldu du Regueirotar gazteenak. Langileek, dena den, beste arrazoi bat ikusten dute IMQko zuzendaritzaren erabakiaren atzean. Egun, klinikak saltzeko prozesu betean daude, eta sinetsita daude hura merkatzeko modu bat izan daitekeela.

Garbitzaileak greba mugagabean daude hilaren 7tik, baina, Jaurlaritzak %100eko zerbitzu minimoak ezarri dituenez, ez da nabaritzen. «Klinika ezin txukunago dago, goitik behera. Eta zerbait hautsi dugula diotenak gezurretan ari dira. Are gehiago, lehen baino lan gehiago egiten dugu, besteak beste erretiluak-eta jaso behar ditugulako, berez gure lana ez dena», zehaztu dute ahizpek.

Grebalarien auzia ELA sindikatuak darama, eta, haren ustez, zuzendaritzaren motibazioa da lan hitzarmen propio bat eskatu zuen langile multzo bati jazartzea. Erlojupean dabiltzan arren, ez dute akordio borondaterik ikusten IMQren aldetik. «Guk subrogazioa aldarrikatzen dugu. Dauzkagun erreminta guztiak erabiliko ditugu», azaldu du Janire Ornes ELAko ordezkariak.

ELAk, LABek eta ESK-k Bizkaiko bulego garbitzaileen lan hitzarmena berritzeko negoziazioen egoera salatzeko manifestazioa antolatu zuten atzo Bilbon, eta IMQko langileak izan ziren protagonista nagusiak. «Ez gara ikusezinak; hemen gaude», izan zen gehien errepikatutako oihua. 11.000 langileri eragiten dien itun bat da, eta gehien-gehienak emakumezkoak dira. «11 aldiz bildu gara, hilabetean behin egiten diren bileretan. Patronalari asko kostatzen zaio mugitzea. Enpresen erdien bulegoak Madrilen daude, eta ez dute ulertu nahi zer bizi maila dagoen Bizkaian», azaldu du Itsasne Nuñez LABeko ordezkariak.

Sindikatuen arabera, negoziazio mahaia blokeatuta dago. Jasotako azken eskaintza 2021ean KPIa %0,5 igotzea da, eta %2 2022an. Haiek, baina, hobekuntza gehiago nahi dituzte. Manifestazioko pankartan «1.200 x 15» irakurtzen zen, soldatari erreferentzia eginez, eta kaleko garbitzaileen aldean dagoen 6.000 euroko soldata arrakala amaitzea nahi dute. «Ezin dugu sinatu langileak are gehiago pobretuko dituen akordiorik. Konpondu ezean, mobilizazio gogorragoak etorriko dira», iragarri du Nuñezek.

Osasun langileek salatu dute Euskadiko Lehen Arretaren egoera “jasanezina” dela. Pandemiak are gehiago tenkatu du asistentzia-maila horren egoera, “lehen ere hilzorian baitzegoen, arazoak egiturazkoak baitira, eta egungo osasun-krisia baino askoz sakonagoak eta zaharragoak”, sindikatuen arabera.

Lanei 2024aren amaieran edo 2025aren hasieran ekingo zaie eta 2,5 kilometroko luzera izango du zati berriak.

PAI Partners Uvescoren akziodunen artean sartu da bere hazkundea bultzatzeko. Sozietatearen egoitza eta bulego nagusiak Gipuzkoan mantenduko dira. Uvesco BM Supermercados eta Super Amara markekin aritzen da.

EHNE, ENBA, UAGA eta UAGNk sektorearen “egoera larriaz” ohartarazi dute. Nekazari eta abeltzain elkarteek eta sindikatuek elkarretaratzeak deitu dituzte merkataritza-guneen aurrean. Abenduaren 28an hasiko dira Nafarroan, eta urtarrilaren 18an bukatuko dira Bizkaian.

Eusko Jaurlaritzak 4.000 lanpostu inguruko Lan Eskaintza Publikoa (LEP) onartu du. Hezkuntzarako 1856 postu izango dira eta Osakidetzarako, 1273; 435 lanpostu Administrazio orokorrerako gordeko dituzte, eta gainerako 424ak, Ertzaintzarako.

Donostiako Instrukzioko 1 zenbakiko Epaitegiak ezetsi egin du Gipuzkoako garraiolariek Foru Aldundiaren eta Aintzane Oiarbide diputatuaren aurka N-I eta A-15 errepideetan kamioiei bidesariak kobratzeagatik jarritako kereila.

BILBO. ELAk eta LABek lanaldi osoko hiru greba egun antolatu dituzte IMQren analisi klinikoetan etziko, ostiralerako eta hurrengo astelehenerako. Ehun langilek osatzen dute analisietako taldea, 30 zentrotan banatuta. Sindikatuen arabera, 20 urte daramatzate hitzarmenik gabe eta lan baldintza «prekarioekin»: kontratu partzialak, 1.200 eurora iristen ez diren soldatak… IMQ osasungintza pribatuko konpainia nagusia da Euskal Herrian: 350.000 bezero inguru ditu. Jabetza eskuz aldatuko da aurki. Garbitzaileak ere greban daude, 90 langileren kaleratzeen aurka.

ZUMAIA. Lan istripuan hildako azkeneko behargina gogoratuko dute Zumaian (Gipuzkoa) eta Bilbon. Besteak beste ELAk eta LABek osatzen duten gehiengo sindikalak deituta, elkarretaratzea egingo dute gaur, 12:30ean, Zumaiako Egurko enpresaren aurrean, Basusta Bidea industria gunean. Han izan zen laneko istripua, igande eguerdian. Pabiloiaren teilatuan zegoen 45 urteko gizonezkoa, garbiketa eta konponketa lanak egiten, eta handik lurrera erori, eta hil egin zen. LAB sindikatuaren zenbaketaren arabera, aurten lanean hildako 62. behargina da. Sindikatu guztiek salatu dute ezbeharra, eta erakundeei eskatu diete laneko heriotzak saihesteko neurriak eta kontrolak areagotzeko. Hain justu horixe bera galdegiteko, UGTk mobilizazioa egingo du Osalanek Bilbon duen egoitzaren aurrean, bihar, 12:00etan.