Irailean 3.367 langabe gutxiago zenbatu dituzte EAEn, eta 205 gehiago, Nafarroan. Guztira 107.996 langabe daude Euskal Autonomia Erkidegoan eta 29.612, berriz, Nafarroan. Gizarte Segurantzak 1.007.609 afiliatu ditu EAEn, eta 309.828, Nafarroan.

Semearekin zegoen Atef Abu Saif Israelek lehen aldiz Gazari eraso egin zionean; han harrapatu zituen biak. Orain, kanpotik begira, semearen larruan jarri da aita: «Semeak ez du inoiz ahantziko bizi izan eta ikusi duena; ez ahantziko eta ez barkatuko». Etorkizunaz zer espero lezakeen ere zalantzan jarri du, eta argitu du «benetako bakeak» ekarriko diela haurrei berriz ere bizitzan sinisteko aukera. «Ez dakit, ordea, bakerik etorriko den». Donostiako udaletxean harrera egin diote gaur arratsaldean Atef Abu Saif idazle eta PAN Palestinako Aginte Nazionaleko Kultura ministro ohiari. Alderdi Eder parketik sartu, eta mahaiaren bueltan eseri dira Eneko Goia Donostiako alkatea [EAJ], Ane Oiarbide PSOEko bozeramailea, Itziar Iturri EH Bilduko zinegotzia, Arantza Gonzalez Elkarrekin Donostiako zinegotzia, Ion Gambra foru aldundiko Giza Eskubideen zuzendaria, Amagoia Mujika BERRIAko zuzendaria, Julen Agirrezabalaga Elkarreko Ikastetxeetako Sustapen Arduraduna eta Lorea Agirre Jakineko zuzendaria. Horren aitzinetik, Eider Mendoza Gipuzkoako Diputatu Nagusiarekin bildu da Abu Saif. Elkar agurtu ondotik, egungo egoeraz galdegin dio Iturrik Abu Saifi; Israel Libanon egiten ari den erasoez, hain zuzen. Argi erantzun dio ministro ohiak: «Benjamin Netanyahuk beldurra dio bakeari. Ez du gerrarik eta sarraskirik bukatzerik nahi, eta horri irtenbidea bilatu dio: bertze gerra bat». Libanoko gerra «arazo berria» dela aitortu du, eta hala izateak arreta guztia «bereganatzen» duela. «Estrategia hutsa da gerra bat tapatzeko bertze bat sortzea», argitu du Abu Saifek. «Gazan egindako ekintza bera da Libanokoa». Irtenbidea Kontzientziaz aritu da idazlea jarraian, ohi denez «berandu» etortzen den horretaz. «Etorriko dira laguntzak, babesa eta elkartasuna; baina ordurako milaka hildako eta desplazatu egonen dira», etsitu du. Joan den urteko urriaren 7az galdetu dio Goiak: Israelek zer-nolako teknologia eta zerbitzu sekretuak dituen jakinik posible ote den Hamasen erasoa ez aurreikusi izana. Honela erantzun dio Abu Saifek: «Hori ezin da jakin, baina anitz dira hala pentsatzen dutenak». Erantzuna hemendik urte batzuetara jakinen dutela ebatzi dute. «Israelek, dena dela, ez du aitzakia beharrik eraso egiteko». «Gerraren kontzeptuan eraiki da Israel», hala sinisten du ministro ohiak; eta ohartarazi du Netanyahu «pertsona arriskutsua» dela gizateriarentzat. Hori adituta, gerraren irtenbideaz galdetu dio Gonzalezek. Abu Saifek erran dio irtenbidea «behartzea» dela, «geldiaraztea»; bere kabuz ez duelako «sekula» halakorik eginen. Aukera bat ere proposatu du: «Nazio Batuen Erakundeko kide egitea da lehen pausoa, guztientzako arau batzuk jartzen direlako eta horiek errespetatu egin behar direlako». «Benjamin Netanyahuk beldurra dio bakeari. Ez du gerrarik eta sarraskirik bukatzerik nahi, eta horri irtenbidea bilatu dio: bertze gerra bat» ATEF ABU SAIF Idazlea eta PAN Palestinako Aginte Nazionaleko Kultura ministro ohia Gizarteari begira, sortutako bi bandoak atera dituzte mahaira: Israelen aldekoak eta Palestinaren aldekoak. «Kontua ez da baten alde jartzea eta bertzearen kontra, baizik eta erabakitzea gizateriaren alde gauden edo ez». Hori argituz gero, arazoa ere argituko zatekeen: bakea lortu, edo gerran jarraitu. «Israelek, baina, uste du ez dagoela inor bere gainetik; ez herrialderik eta ez araurik». Iranen rola aztertu du Abu Saifek ondotik, eta aitortu du Estatu Batuen antza hartzen diola anitzetan. «Libano gerran da, Yemen, Siria, Gaza… gerran sartu ez den bakarra Iran da, eta hark du giltza». Horrez gain, «haien interesen harira» jokatzen duela nabarmendu du, «gehiegi sartu gabe baina guztia kontrolatuz». Munduaren ikuskera orokor bat emanda, itxaropentsu bukatu nahi izan du bilera Atef Abu Saifek: «Segi dezazuela bakearen alde».

Azkenean, gaur iritsi da duela zenbait aste Iranek Israelen aurka iragarritako mendekua: Israel bonbardatu du. Reuters berri agentziak kaleratu duenez, berrehun misil inguru jaurti ditu Israelgo lurretara. Erasoa hiru buruzagiren hilketen mendekua hartzeko izan dela jakinarazi du berri agentziak, Irango Guardia Iraultzaileko iturriak aipatuta: Hezbollahko buruzagi Hassan Nasrallahrena, Hamaseko adar politikoko buruzagi izandako Ismail Haniyehrena eta Hezbollahren Irango laguntzaile militar Abbas Nilforoushanena. Erasoa amaitutzat eman du Iranek, baina Tel Avivi ohartarazi dio erantzunez gero berriz egingo diola eraso. Israelgo armadako bozeramaile Daniel Hagarik telebistaz egindako adierazpenetan esan du «mendekua» hartuko dutela: «Israelgo armada prest dago herritarrak babestu eta Irango erasoagatik mendekua hartzeko. Erantzuna, baina, momenturik egokienean helduko da». Herrialdea «alertan» dagoela gaineratu du. AEB Ameriketako Estatu Batuetako presidente Joe Bidenek, bestalde, Israel babestuko duela adierazi du X sare sozialaren bidez —mezua argitaratu duenean, oraindik ezbaian zegoen Iranek eraso egingo ote zuen—: «AEBek Iranen eraso baten aurrean Israel nola babestuko duten eztabaidatu dut presidenteordearekin». Gainera, erasoa hasi eta minutu gutxira Ekialde Hurbilean dauden AEBetako soldaduei misilen aurka egiteko agindu die presidenteak. Iranen erasoa iritsi baino ordu batzuk lehenago, gaur goizaldean, Israelek «gerraren hurrengo fasea» deitu diona hasi du Libanon. Israelek esan du lurreko erasoaldiak «mugatuak, tokian tokikoak eta selektiboak» izango direla. Zehaztu du inbaditu dituen herrixkak arriskutsuak direla Israel iparraldean dauden komunitateentzat. Oraindik ez dute jakinarazi zeintzuk izan diren lurreko inbasioaren ondorioak, baina Libanoko Osasun Ministerioak jakinarazi du Israelen bonbardaketek 95 lagun hil dituztela azken 24 orduetan, eta 172 zauritu. Hezbollahk, ordea, ukatu egin du Israelgo armadak Libanoko lurreko erasoaldia hasi duela. Hala adierazi dio taldeko prentsa arduradunak Al Jazeera telebista kateari. Libano hegoaldean «borroka biziak» gertatzen ari direla jakinarazi du Avichay Adraee Israelgo armadako arabierazko bozeramaileak X sare sozialean. Geroago, Israelgo beste iturri ofizial batek ukatu egin dio Reuters berri agentziari Israelgo soldaduak eta Hezbollahko kideak aurrez aurre borrokan aritu direla. Adraeek Libanoko herritarrei ohartarazi die, «beren segurtasunerako», ez joateko herrialdearen hegoaldera. Geroago, etxetik «berehala» alde egiteko agindu die Libano hegoaldeko 30 herritako biztanleei: «Israelgo armadak ez dizue kalterik egin nahi. Utzi etxea, eta joan berehala Awali ibaiaren iparraldera». Gehitu du jakinaraziko dietela noiz itzuli ahal diren etxera. Hezbollahk ohar bidez adierazi du Israelgo armadako tropei eraso egin diela Metulako mugaren inguruan, eta suziri bat jaurti duela Mossad Israelgo zerbitzu sekretuen egoitzaren aurka. Atzo arratsaldean, Yoav Gallant Israelgo Defentsa ministroak iradoki zuen lurreko erasoa hastear zela. Bada, ordu batzuk geroago, Israelgo armadaren 98. dibisioa —aurrez Gazan aritu zen borrokan— «eraso jakin batzuk» egiten hasi da Libano hegoaldeko herrixketan. Hori jakinarazi du armadak Telegram kanalean. Azken bi asteetan egindako aire erasoak ere «jakin» moduan definitu izan ditu Tel Avivek. Baina, jada, milatik gora lagun hil dituzte bonbardaketa horiek, Libanoko Gobernuak emandako datuen arabera; baita milioi bat lagun desplazatzera behartu ere. Aire erasoekin jarraitu du Tel Avivek. Beirut hegoaldeko Dahieh auzoko zenbait eraikin bonbardatu dituztela jakinarazi du Israelgo armadak. Libanon dagoen errefuxiatu palestinarren kanpaleku bat ere bonbardatu du: Ein al-Hilweh. Gutxienez bost pertsona hil dira eraso horretan. Mugatik 50 kilometrora dago, Sidon hirian, eta 100.000 palestinar daude hor. Israelek esan du Palestinako Al-Fatah erakundeari lotutako Al-Aqsako Martirien Brigadako liderraren etxea zuela jomuga bonbardaketak. Libanoko hedabideen arabera, ez dute hil. Libano «historiako aldirik arriskutsuenetako» batean dagoela ohartarazi du Najib Mikati lehen ministroak. NBE Nazio Batuen Erakundeko zenbait ordezkarirekin eginiko bilera batean egin ditu adierazpen horiek. Nazioartearen jarrera Israel Libanon egiten ari den erasoek AEB Ameriketako Estatu Batuen oniritzia dute. Pentagonoak zabaldutako ohar batean diotenez, bart telefonoz hitz egin dute AEBetako Defentsa idazkari Lloyd Austinek eta Gallantek. Ziurtatu dutenez, «beharrezkoa» da Libanoren eta Israelen arteko mugako «erasorako azpiegiturak desegitea», Hezbollahk Israel iparraldean erasorik egin ez dezan. Gainera, AEBek militar gehiago bidaliko dituzte Ekialde Hurbilera. Bart Pentagonoko bozeramaile Sabrina Singhek jakinarazi zuenez, aurrez dituzten soldaduei «milaka batzuk» gehituko zaizkie, «beharrezkoa balitz» Israeli lagundu ahal izateko. Bestalde, EB Europako Batasunak Libanoren eta Israelen arteko borrokak eteteko deia egin du. Israelgo armadak lurreko erasoei ekin baino lehen, atzo arratsaldean mintzatu zen Josep Borrell EBko diplomaziaburua. Israelek azken egunetan Libanon egindako erasoen harira, Borrellek bilera batera deitu zituen EBko estatu kideetako Atzerri ministroak, eta, bilkuraren ostean, adierazi zuen esku hartze militarrak areagotzea eragotzi behar zela: «Jakina da [Israel] Hezbollahko buruzagien aurka ari dela, baina herrialde independente baten subiranotasuna urratzen ari dira. Ezin da ahaztu erasoek lagun andana hil dutela ere». Gainera, NBEren 1701. ebazpena betetzeko deia egin zuen. «Jakina da [Israel] Hezbollahko buruzagien aurka ari dela, baina herrialde independente baten subiranotasuna urratzen ari dira» JOSEP BORRELL EBko diplomaziaburua Ebazpen horrek Israelen eta Libanoren arteko 2006ko gerraren amaiera ekarri zuen. Haren arabera, inolako talde armatu ezin da egon Libano hegoaldean —Litani ibaiaren eta Israelgo mugaren artean—; soilik, bakea mantentzeko lanetan diharduten Libanoko armadak eta Unifil NBEren Libanorako misioak jardun dezakete bertan. Hezbollahk ez duela ebazpenak dioena betetzen, hori argudiatuz justifikatu du Daniel Hagari Israelgo armadako bozeramaileak gaur hasi duten lurreko erasoaldia. Eraso horrekin, ordea, Tel Avivek urratu egin du NBEren ebazpenak dioena. Ez soilik Libanon Israelgo armadak Libanotik kanpo ere jarraitzen du erasoan. Gaur, Israelgo soldaduek tiroz hil dituzte bi lagun Zisjordaniako Nablus hirian. Palestinako Osasun Ministerioak eman du gertaeraren berri. Bestalde, Siriako Berri Agentzia Nazionalak jakinarazi du hiru lagun hil dituela Tel Avivek Damaskon egindako aire eraso batek. Hil dituztenetako bat Siriako telebista kate bateko kazetaria zen.

EAJk ekin dio bere zuzendaritza berritzeko prozesuari, eta lehen urratsak herrialde batzarretan egingo dituzte: azaroaren 23an eta 24an aukeratuko dituzte BBB Bizkai Buru Batzar, GBB Gipuzko Buru Batzar, ABB Araba Buru Batzar, NBB Napar Buru Batzar eta IBB Ipar Buru Batzarreko zuzendaritzetako kide berriak. Gaur iragarri dute aukeraketa prozesua hasi dela. Lehenik, hautagaiak aurkeztu beharko dituzte herrialde batzar bakoitzaren presidente izateko, burukide izateko, herrialde bakoitzeko justizia auzitegirako ordezkari izateko eta herrialde bakoitzak EAJren Aberri Batzarrean izango dituen ahaldunak izateko. Ondoren, lehen itzuli horren ondoriozko hautagai zerrenda orokorrak bozkatu beharko dituzte uri buru batzarrek —herrietako EAJren erakundeek—. Azkenik, herrialde batzar bana egingo dute Araban, Bizkaian, Gipuzkoan, Nafarroan eta Ipar Euskal Herrian, eremu bakoitzeko zuzendaritzak izendatzeko. Azaroaren 23an izango dira gehienak; Gipuzkoan, azaroaren 18aren 24aren artean egingo dute. Herrialdeetako zuzendaritza berriak izendatu ostean, EBB Euskadi Buru Batzarraren txanda izango da. Herenegun egindako Alderdi Egunean eman zuten epeen berri: martxoaren 29an eta 30ean egingo dute Donostian IX. Batzar Nagusia, eta alderdiko presidentea eta zortzi burukide aukeratuko dituzte. Gaur egun, Andoni Ortuzar da EBBko presidentea, Itxaso Atutxa BBBkoa, Joseba Egibar GBBkoa, Jose Antonio Suso ABBkoa, Unai Hualde NBBkoa eta Peio Etxeleku, berriz, IBBkoa.

Eusko Jaurlaritzak bere gain hartuko ditu AHTaren Arkauteko lotunea eraikitzeko lanak eta gero Estatuari kobratuko dio Kupoaren bitartez. Gainera, Espainiako Gobernuak 146 milioi euroko inbertsioa onartu du Arkauteko lotunea egiteko.

Euroguneko inflazioa lau hamarren jaitsi da irailean, % 1,8raino, eta 2021eko apiriletik izandako mailarik baxuenean kokatu da.

EHUko irakasle batek sare sozialetan zabaldutako mezu «arrazistak, klasistak, matxistak eta misoginoak» salatzeko protesta bat egin dute gaur Leioan (Bizkaia), Zuzenbide Fakultatean, eta unibertsitateko buruei eskatu diete «berehalakoan» kaleratzeko unibertsitatetik. Zuzenbide Fakultateko ikasle asanbladak elkarretaratzerako deia egina zuen gaurko, 11:00etan, eta Ernaik eta Ikasle Abertzaleak taldeak babestu dute. Jendetsua izan da. EHUko segurtasun langileek lagunduta atera behar izan zuen lehengo astean irakasle horrek berak ikasgelatik; izan ere, sare sozialetan idatziak zituen mezuek asaldaturik, ikasle talde batek protesta egin zuen haren aurka. Elkarretaratzean, ikasleek onartu dute egindako «presioari esker» utzi behar izan zuela irakasleak bertan behera bere eskola ordua: «Campusetik irtetera behartu genuen». Defendatu egin dute jokabidea: «Izan ere, unibertsitateak arrazoizko eta garapen askerako espazioa izan behar du, eta inondik inora ere ezin ditu onartu kolektibo zaurgarrien aurkako, langile klasearen aurkako edota emakumeen aurkako jarrerak eta ideiak zabaltzen dituzten faxistak». EHUko errektoretzaren jarrera salatu dute. Batetik, ez zaie ondo iruditu hark idatzitako mezuen «jakitun» izan arren irakasleari eskolak ematen utzi izana. Bestetik, ikasleak haserre daude irakasleak unibertsitatean jarraitzen duelako oraindik. EHUk esan du ikertu egingo dituela irakaslearen iruzkinak, eta onartu du akaso irakasleak sare sozialetan idatzitakoa «bateraezina» dela unibertsitatearen kode etikoarekin. Orain arte haren kontra jakinarazi duten neurri bakarra behin-behinekoa da. Bertan behera utzi dituzte irakasle haren aste honetako eskolak: astelehenetan eta ostiraletan ematen ditu, eta asteon, behintzat, ez du eskolarik emango. Hortik aurrerakorik ez dute erabaki oraindik. Baina hori ez da nahikoa gaur protestan batu diren ikasleentzat, eta kritika egin diete unibertsitateko buruei: «Egin dituzten adierazpen bakarrak ikasleon aurkakoak izan dira. Lotsagarria da EHUren hipokrisia: errespetuaz eta tolerantziaz hitz egiten dute faxista bat babesten ari diren heinean». EHUk ostiralean jakinarazi zuen irakaslearen iruzkinak aztertzeko asmoa, prentsa ohar baten bidez. Ohar horretan bertan, ikasleek irakasle horren kontra erakutsi zuten «bortxa» salatu zuen, eta esan zuen portaera «onartezina» izan zela. «Irmo» gaitzetsi zuen gertatutakoa. Ostegunean Joan den ostegunean hasi ziren ikasleen protestak. Ernaiko kide batzuek irakasle horren bulegoko atea margotu zuten. Ernaik jakinarazi zuen ikasturte honetarako «irakasle faxista bat» kontratatu duela EHUk. Gazte mugimendu horrek eman zuen irakasleak idatziriko mezuen berri. Faxismoaren gorakadarekin lotu zuten haren jarrera: «Ez dugu jarrera erreakzionariorik onartuko».

Israelgo armadak Beirut erdialdea bonbardatu du gaur goizaldean. Libanoko hiriburuaren aldirietan egin ditu erasoak azken egunetan, baina hiriaren erdialdea bonbardatu duen lehen aldia da 2006ko gerraz geroztik. Zehazki, gehiengo sunita duen auzo bateko etxebizitza eraikin bati egin dio eraso Israelek. PAHF Palestina Askatzeko Herri Fronteak ohar baten bidez jakinarazi duenez, haien miliziako hiru lider hil dituzte eraso horretan; guztira lau lagun hil dituztela jakinarazi du Libanoko Osasun Ministerioak. Gainera, herrialdearen hegoaldean ere egin ditu bonbardaketak Tel Avivek. Horietako batean Hamasen Libanoko burua hil dute, Hamasek berak baieztatu duenez. Beiruteko Dahieh auzoa behin baino gehiagotan bonbardatu du Israelek azken bi asteetan. Libanoko hiriburuaren hegoaldeko auzo hori Hezbollah talde xiitaren indarguneetako bat da. Bertan hil zuten joan den ostiralean Hezbollahko buru Hassan Nasrallah. Gaur, baina, hiriaren erdiguneraino iritsi da Israelgo armada; Cola izeneko gune jendetsu batetik hurbil egin du bonbardaketa, eraikin bateko zenbait solairu suntsituz. Tel Avivek beste muga bat igaro du gaurko erasoarekin: Libanoren eta Israelen arteko 2006ko gerraz geroztik, lehen aldia da hiriburuko erdialdeari eraso diona. Joan den ostiralean, Benjamin Netanyahu Israelgo lehen ministroak Erresistentziaren Ardatza izan zuen hizpide NBE Nazio Batuen Erakundearen Batzar Nagusian; hura egin zuen Ekialde Hurbileko gatazken erantzule. Erresistentziaren Ardatza deritzote Irani eta hark militarki eta ekonomikoki babesten dituen miliziei. Milizia horien artean aipatu zituen Hamas eta Hezbollah, eta bi fronteak —Gazakoa eta Libanokoa— irekita mantentzeko prest agertu zen Israelgo lehen ministroa. Hitzaldia amaitu eta ordu gutxira, Beirut bonbardatu eta Hezbollahko burua hil zuten. Hezbollahren eta Palestinako milizien aurkako erasoez gain, Erresistentziaren Ardatzari beste kolpe bat eman zion atzo Tel Avivek: Yemengo huthien aurka egin zuen eraso Al-Hudaida hiriko portua bonbardatuta. Iazko urrian Israelek Gazako oldarraldia gogortu zuenetik, Israelen aurkako eraso ugari egin dituzte huthiek; gehienak Itsaso Gorrian, Tel Aviv babesten duten herrialdeetako zamaontzien aurka. Sutea Yemengo Al-Hudaida hiriko portuan, atzo Israelgo armadak eraso egin ostean. EFE Gazan, Libanon zein Yemenen borrokatzeko prest dagoela erakutsi du Tel Avivek; eta Iranen eraso baten zain dago haren aurka egiteko. «Ekialde Hurbilean ez dago gunerik zeinetara Israel ezin den iritsi», ohartarazi du gaur Netanyahuk X sare sozialean zabaldutako adierazpenean. Eta ziurtatu du Iran «aske» izango dela «jendeak uste baino lehenago». Hain zuzen, Hezbollahren, Hamasen eta huthien erantzunak eta, batez ere, Teheranek hartzen duen jokabideak baldintzatuko du gatazka noraino hedatzen den. Gaur, Irango Atzerri Ministerioko bozeramaile Nasser Kanaanik, prentsaurreko batean, beste abisu bat eman dio Tel Avivi, baina ez du berehalako erasorik iragarri: «Ez ditugu erantzunik gabe utziko gure interes nazionalak urratzen dituzten erasoak». Ostiralean Beiruten egindako erasoan, Hezbollahko buruaz gainera, Irango Guardia Iraultzaileko jeneral bat ere hil zuen Israelgo armadak. AEB Ameriketako Estatu Batuek, berriz, Teherani ohartarazi diote ezen, egungo egoera «AEBen interesei» kalte egiteko baliatzen badute, Washingtonek defentsarako «beharrezko neurri guztiak» hartuko dituela. Pentagonoak bart zabaldutako oharrean gehitu duenez, AEBek «ahalmen handia» dute oraindik ere Ekialde Hurbilean. Izan ere, CNN hedabideak iturri ofizial bat aipatuta kaleratu duenez, Pentagonoak Iranen eraso bat espero du Nasrallahren hilketari erantzuteko. Horregatik, jakinarazi du AEBak Israelekin «lanean» ari direla eraso posible horren defentsa prestatzeko. Hain justu, gaur iluntzean Israelgo armadak eremu militar izendatu ditu Libanorekin mugan dauden hiru herri, eta, AP albiste agentziak jakinarazi duenez, soldadu israeldarrek sartu-irten bat egin dute Libano hegoaldean, milizia xiitaren «tunel bati» eraso egiteko. Hezbollah, lurreko erasorako prest Hezbollahko idazkariorde nagusi Naim Qassem ere mintzatu da gaur. Telebista bidez eginiko adierazpenetan, ziurtatu du talde xiita prest dagoela Israelen lurreko eraso bati erantzuna emateko. Era berean, jakinarazi du Hezbollahko lider berria «ahalik eta lasterren» izendatuko dutela. Libanoko Gobernuak, ostera, su etena lortu nahian jarraitzen du. Libanoko Berri Agentzia Nazionalak azaldu duenez, aurreko ostegunean AEBek, Europako Batasunak eta beste zenbait herrialdek egindako proposamena martxan jartzeko asmoa azaldu du Najib Mikati Libanoko lehen ministroak. Horretarako, lehen ministroa prest agertu da 2006ko gerra amaitzea eragin zuen NBEren 1701. ebazpena indarrean jarri eta, bakea mantentzeko asmoz, Libanoko armada herrialdearen hegoaldera bidaltzeko. Behin su etena lortuz gero, lehen ministroak esan du presidentea hautatzeko bozketa batera deituko duela parlamentuan. Izan ere, Libanoko presidente kargua hutsik dago 2022ko urritik. bahituen familiek protestan jarraitzen dute Iazko urriaren 7an Hamasek Israelen egindako erasoetan bahitutakoen familiek protesta egiten jarraitzen dute. Gaur, Benjamin Netanyahu Israelgo lehen ministroaren etxearen aurrean batu dira, Jerusalemen. Akordio bat egin eta bahituak askatzeko eskatu diote Netanyahuri. Tel Aviven arabera, iazko urrian bahitutako 251 herritarretatik 97 daude oraindik ere Gazan. Bestalde, Israelek uko egin dio preso palestinar baten gorpua bere familiari emateari. Hamasekin negoziatzeko baliagarria izango delakoan hartu zuen erabakia Yoav Gallant Defentsa ministroak eta, gaur, Israelgo Auzitegi Nagusiak berretsi egin du. Presoa apirilean zendu zen minbiziaren eraginez, 38 urte gatibu igaro ostean.

Zuzendaritzak eta enpresa batzordeak bilera egin dute astelehen honetan Euskadiko lantegi handienaren egoera aztertzeko. Aurten, 33 egunez gelditu behar izan dute ekoizpena, malgutasun neurriei helduta, aldi baterako lan-erregulazioa saihesteko.

Errexil sariketa berriko bigarren eta azken kanporaketa iragan zen joan den ostiralean, Urruñan (Lapurdi). Ondorioz, ezagunak dira urriaren 4ko, ostiraleko finalean kantatuko duten bertsolarien izenak: Eneko Lazkoz, Aissa Intxausti, Miren Artetxe, Eneko Abasolo Abarkas, Maddi Sarasua eta Ramuntxo Christy. Gai emaile Aritz Bidegain arituko da. Urruñako Herriko Etxeak lagundu sariketa berria irailaren 20an hasi zuten, eta Eneko Lazkoz nagusitu zen. Ostiraleko bigarren kanporaketan, Aissa Intxausti izan zen garaile. Ostiraleko finala 19:00etan hasiko da, Urruñako Posta gelan. Txapeldunari Errexil bertsolariaren seme Jean Louis Eizmendi Errexil II.ak jantziko dio txapela.