Deialdi honen bidez, garraiolarien erretiro aurreratua arautzea eskatu nahi dute, lanbidearen arrisku-mailagatik. Lanuztea urriaren 28an, azaroaren 11n, 28an eta 29an, eta abenduaren 5ean eta 9an egingo da, eta abenduaren 23tik aurrera mugagabea izango da.

Gorenak babestu du auzokideen erkidegoek hiru bosteneko gehiengoz debeka dezaketela alokairu turistikoa

29 urteko behargin bat oso larri zauritu da Funesen, makina batek beso bat harrapatuta

Luis Baraiazarra aita Luis «Bertsoaren eragile nekaezina» dela nabarmendu du Bertsozale Elkarteak. 1991tik 1994ra bitartean Euskal Herriko Bertsozale Elkarteko zuzendaritzan parte hartu zuen, baina Bizkaiko Bertsozale elkartean ere, 1991tik 200ra bitartean. Bestela ere erakutsi zuen bertsozaletasuna, esate baterako, hainbat txapelketatan epaile gisa parte hartuz, haa nola Lea-Artibai eskualdekoetan, Euskal Herriko Txapelketa Nagusian, eta eskolartekoetan. Euskal filologian lizentziatu zen Deustuko Unibertsitatean, eta, irakasle zela urte luzez landu zituen bertsoak eta euskal kantak umeekin. Ikasmateriala sortzen ere aritu zen. Euskaltzaindian ere arrasto handia utzitakoa da Baraiazarra. 1996an euskaltzain urgazle eta 2010ean euskaltzain ohorezko izendatu zutenetik, hainbat batzrodetan aritu zen lanean: Hiztegi Batuko lantaldean (1993-2017), Gramatika batzordean (1997-2007), Euskaltzaindiaren Hiztegia batzordean eta Adierak eta adibideak lantaldean. Bestalde, idazle eta itzultzaile ere bazen. Augustin Zubikarai, Santi Onaindia eta Jon Lopategiren biografiak landu zituen, besteak beste, eta itzultzaile gisa, testu erlijiosoei heldu zien nagusiki. Hark euskaratu zituen, esate baterako, Santa Teresa Jesusenaren idazlan guztiak, eta horiei esker, hain zuzen, Espainiako Itzulpen Onenaren saria eman zioten 2015ean. Ordu gutxiren buruan kendu zioten, arrazoi harrigarriak tarteko.

Jon Ander Peñak eta Jose Javier Zabaletak irabazi dute Caixabank Mastersaren laugarren aldia. Finala gaur jokatu dute Nafarroa Arenan, eta 13-22 irabazi diete Altuna III.a-Iztuetari. Partida lehiatua izan da lehen erdian, eta atsedenaldira 12-11 aurretik heldu dira Altuna eta Iztueta. Bigarren erdian, ordea, 1-11ko partziala egin dute txapeldunek. Protagonista Martxel Iztueta izan da, Baikoko atzelari gaztea. Peñak eta Zabaleta etengabe bota dizkiote pilotak, baina ahal izan duen bitartean ederki erantzun du hark. Lehiaren lehen erdian estuasunetan ere jarri du Zabaleta, eta zaleen txaloak irabazi ditu. Iztueta nekatzen joan ahala, ordea, errematerako aukera gehiago izan ditu Peñak, eta ezer gutxi egiteko aukera izan du Altunak. Tantoak amaitzen asmatu du Tolosako aurrelariak, eta aurrez egindako higadura lanak izan du saria.

Jai giroan ospatu dute Kilometroak jaia, gaur, Azpeitian (Gipuzkoa). Giro lainotua izan da, baina euririk, behintzat, ez dute izan Gipuzkoako Ikastolen aldeko festan elkartu diren milaka euskaltzaleek. Amaitutakoan, antolatzaileek adierazi dute dena aurreikusi bezala joan dela, eta «bizipen zoragarria» izan dela urte osoan zehar Kilometroak antolatzea. Azken egunean, mila lagun baino gehiago ibili dira boluntario lanetan. Oro har, intzidentziarik ez dela izan azaldu dute —ezta puntu moreetan ere—, eta jende ugari elkartu dela, nagusiki familiak, baina baita gazteak ere. Giro jator eta lasaia izan dela nabarmendu dute, eta euskara arin eta bizi entzun dutela. Hasiera ekitaldian, Igor Aranbarri Azpeitiko Ikastola Ikasberriko kontseiluko kidea izan da hitza hartzen lehena. «Aurtengo Kilometroen urtean abiatu dugun bidean jarraitzea da gure desioa. Aurrerantzean ere gure ardatzek etenik gabeko mugimenduan jarrai dezaten. Eta horretarako, ikasturte guztian zehar erein dugun hazia ernatzeko baldintza egokiak sortzea da hurrengo erronka». Kilometroak jaiaren hasiera ekitaldia, gaur, Azpeitian. GORKA RUBIO / FOKU Izan ere, Izpiz izpi lelopean, euskaran, kulturartekotasunean eta herrigintzan ardaztu dute urteko lana, eta gaur jasotakoa ardatz horien inguruko proiektuak finantzatzeko erabiliko dute. Nagore Alkorta alkateak ere urte osoan zehar ikastolak egindako lana azpimarratu du, eta eskerrak eman dizkie egitasmoaren sustatzaileei. «Nahiz eta beti izan den garrantzitsua euskararen alde egitea, bizi dugun testuinguruan inoiz baino beharrezkoagoa dela esango nuke», gehitu du. «Ea lortzen dugu euskarari beste bultzada bat ematea». Begoña Pedrosa Eusko Jaurlaritzako Hezkuntza Sailburuak, bere aldetik, goraipatu egin ditu aurtengo Kilometroak ardaztu duten zutabeak. Esan du sakondu egin behar dela, euskal curriculumaren lanketan ez ezik, hizkuntza proiektu sendoetan, irakasleen prestakuntzan eta ikasleen aniztasunaren inguruko lanketan. Ildo beretik jo du Eider Mendoza Gipuzkoako ahaldun nagusiak ere. Azpeititik Elgoibarrera Azkenik, Alaitz Perez de Arenaza Kilometroak Kultur Elkartearen lehendakariak hitz egin du. Antolatzaileei eskerrak eman dizkie, eta nabarmendu du Azpeitia euskararentzat «arnasgune handia» dela. Horregatik, Azpeitiak eta bertako ikastolak ere XXI. mendeko erronkei erantzuteko eginahalak egin behar dituela narbarmendu du: «Euskaratik kulturarteko hezkuntza eta harremanak eraikitzea ezinbesteko erronka bihurtu zaigu. Ezberdinon arteko harremanak aitortu eta sustatuz berrituko gara». Pirritx, Porrotx eta Marimototsi eta Txapasi omenaldia egin diete. GORKA RUBIO / FOKU Ikastolako bi ikaslek aurkeztutako ekitaldian omenaldia egin diete Pirritx, Porrotx eta Marimotots pailazoei, haien jardunak bat egiten duelako gaur behin eta berriz aipatu dituzten hiru ardatzekin: euskara, kulturaniztasuna, eta herrigintza. Eskertuta agertu dira pailazoak, eta hala esan du Pirritxek: «Nik begiak ixten ditudanean Gabonak eta Kilometroak etortzen zaizkit burura». Jarraian, kalejiran egin dute Ikastolatik Azoka plazara arteko bidea. Han egin dute lekukoa eskualdatzeko ekitaldia, eta Elgoibarko Ikastolako Jon Lizarraldek jaso du. Han izango da festa datorren urtean, urriaren 5ean. Ginga Gaur, beraz, ginga jarri diote urtean zehar egindako lanari. Eskaintza oparoa eta gustu guztietarakoa prestatu dute, euskal kulturan ardaztutakoa batez ere. Lehen gunea herriko plazan egon da, eta Herria deitu dute. Bertan herri kirolak, mutxikoak eta bertsolariak izan dira. Erronka hor izan da, eta dantza egiteko beta ere izan da. Bigarren eta hirugarren gunea Euskara izendatutakoak izan dira. Bigarrenean, Esklabetan, gazteenentzako eskaintza atondu dute: magoak, karaokea eta Goa!zen-en ikuskizuna, eta puzgarriak ere bai. [articles:2131170] Hirugarren gunean, Ikastolan, kontzertuak izan dira bata bestearen atzetik. Skapaie elektrotxaranga, Leherkaitz, Ukabil, Tapia eta Leturia eta Janus Lester. Troia kale antzerkia ere izan da goiz partean. Laugarren gunea Loiolan egon da, eta Aniztasuna deitu diote. Egon da yoga, gimnastika erritmikoa eta judo erakustaldia. Horretaz gain, ez da musika falta izan. Ro, Eraldatzen, Trini Fox eta Urtz moduko taldeak izan dira. Jolasak, giro ona, eta jan-edanerako askotariko eskaintza ere izan da, noski, gune guztietan.

Neurri hau bihar, astelehena, sartuko da indarrean. Horrela, Muntaketa Gordina, Pintura eta Azken Muntaketa sailetan, 04:30ean amaituko da gaueko txanda.

Leioako errepidea egokitzeko lanen amaiera urtebete inguru aurreratzea eta udaberrian bukatzea espero dute

Israelek Gazaren kontra abiarazitako sarraskiak urtebete egingo du aurki, eta, horren karietara, mundu osoan bezala Euskal Herrian ere ugaldu dira protesta eta elkartasun adierazpenak. Gaur, milaka lagunek bat egin dute eguerdian Bilbon Palestinarekin Elkartasuna plataformak egindako deialdiarekin, «Palestinako erresistentziari babesa azaldu eta Israeli eta haren konplizeei aurre egiteko»; Iruñeko kaleetan ere milaka lagun elkartu dira, arratsaldean, Genozidio bat, 76 urteko erresistentzia zioen pankartaren atzean. Manifestazioa Jesusen Bihotza plazatik abiatu, eta udaletxearen aurrean amaitu da. Han, antolatzaileek agiria irakurri dute, arabieraz, euskaraz eta gaztelaniaz. Azken urte honetan Gazan gertatutakoa salatu dute: «Urtebete honek agerian utzi du berriz ere kapitalismoaren eta inperialismoaren alderik krudelena. Ikusi dugu Israelgo armada Gaza okupatzen, ospitaleak, ikastetxeak eta hirigune osoak bonbardatzen, ikusi ditugu hornidura mozketak, milioika biztanleren desplazamendua, laguntza humanitarioaren blokeoa eta sartzen ziren kamioietako batzuen aurkako erasoak. Ikusi dugu Gaza erditik zatitzen». Baina, plataformaren iritziz, auzia ez da soilik Gazaren kontrako erasoa: «Israelek ez du nahikoa herri palestinarra desagerrarazten saiatzearekin. Sionismoa proiektu supremazista eta espantsionista da, eta haren lurralde goseak ez du mugarik». Zisjordanian ezarritako 30 kolonia berriak eta Libano, Siria, Iran eta Yemenen kontra egindako erasoak gogora ekarri dituzte, eta elkartasuna adierazi diete «Palestinako erresistentziari eta eskualdeko herrialde guztietan, Yemenetik Libanora, munstro sionistaren kontra borrokan ari diren guztiei». «Israel zigortu behar da. Israelekin harremanak eten behar dira. Israel bakartu behar da, legeak behartuta» LIDON SORIANO Yala Nafarroako ekintzailea Palestinarekin Elkartasuna plataformaren iritziz, Israel «NATOren bloke geopolitikoaren base militarra» da, eta horregatik «eskuak libre» ditu lurraldean zehar hedatzeko: «Hau guztia ez da burua galdu duen agintari baten errua». Horregatik, AEBetako eta Europako gobernuak, enpresak eta alderdiak «konplizetzat» dauzkate: «Haiek dira Israel armaz eta babes mediatikoz hornitzen dutenak, haren erretolika edozein delarik ere». «Aukera bakarra dago basakeria hau geldiarazteko: Israelgo estatua desagertzea. Eta Israelgo estatua hemen hasten da». Palestinako erresistentzia babesteaz batera, Mendebaldeko gobernu, enpresa eta alderdiak «presionatu» eta Israelen kontrako boikota areagotzeko deia egin dute: «Borrokan jarraitu behar dugu, Israelgo estatu terrorista desegin eta ibaitik itsasorainoko Palestina aske bat eraiki arte». Jendetza kalean Manifestazioa eguerdian abiatzekoa zen, baina lehenagotik ere jendetza handia egon da Jesusen Bihotza plazaren inguruetan. Manifestarietako askok Palestinaren ikurrak, elastikoak edo kartelak zeramatzaten, baita Libanoren ikurrak ere, eta herri arabiarretako komunitatearen kideak ugariak ziren. Bezperan, 24 orduko elkartasun baraualdiak egin zituzten Bilbon, Donostian, Gasteizen, Iruñean eta Sakanan (Nafarroa), manifestaziorako deia egiteko. Atzo goizean amaitu zen ekinbidea, eta horretan parte hartutakoak mobilizazioan egon dira. Atef Abu Saif idazle palestinarra eta PAN Palestinako Aginte Nazionaleko Kultura ministro ohia ere han egon da. Egunotan Euskal Herrian dago, Gazako egunerokoa liburua aurkezteko, eta hark ere mobilizazioan parte hartu nahi izan zuen. Manifestazioa hasi aurretik, plataformako kide Eneko Callek eta Esther Muñozek adierazpenak egin dituzte. Manifestazioaren goiburuak gogorarazi dituzte, eta nabarmendu dute Euskal Herri osotik iritsitako jendea zegoela mobilizazioan. «Azken egunotan agerian geratu da Israelek ez duela bakerik nahi, eta gerra eskualde osora eramatea duela helburu», erantsi dute. Kale Nagusian antolatuta zegoen beste ekitaldi bat zela eta, manifestazioaren hasiera atzeratu egin da, eta, azkenean, 12:25ean abiatu da. Mobilizazioaren buruan ikurrina eta Palestinako ikurra joan dira, eta, horren ostean, pankarta nagusia, deialdiaren goiburuekin: Palestinaren erresistentzia babestu, Israeli eta bere konplizeei aurre egin. Atzean milaka lagun, Kale Nagusi osoa betez. Manifestariek Palestinaren aldeko eta Israelen kontrako oihuak egin dituzte manifestazioak iraun zuen bitartean: Boikot Israel, Palestina askatu; Estatu sionista, estatu terrorista; Israel hiltzaile, Europa laguntzaile; Libanorekin elkartasuna; Ez da gerra, genozidioa da; Ibaitik itsasora, Palestina gailenduko da eta abar. Bilboko manifestazioko parte hartzaile bat, garaipenaren ikurra egiten. JAIZKI FONTANEDA / FOKU Manifestariak Plaza Eliptikora iritsi direnean, Espainiako Gobernuaren ordezkaritzaren aurrean zeuden zenbait lagun izan dituzte zain, pankarta batekin. Han, Israelgo lehen ministro Benjamin Netanyahuren eta Europako buruzagi politiko batzuen irudiez gain, Israel eta bere konplizeei aurre egin leloa zegoen ikusgai. Manifestazio osoan errepikatu da hori: ibilbidean zeuden zenbait leku esanguratsutan, antolatzaileek pankartak erakutsi dituzte, Israelen «konplizetzat» jotzen dituzten eragile politiko eta ekonomikoen jarrera salatzeko. Bizkaiko Foru Aldundiaren jauregiaren aurrean, Euskal instituzio burgesak sarraskiaren konplize leloa zeukan pankarta bat erakutsi dute antolatzaileek. Apur bat aurrerago, Kale Nagusian, BBVAren egoitza dago, eta han ere BBVA hiltzaile esaldia idatzita zeukan pankarta bat atera dute. Ordurako, jende andanak osatu du manifestazioa, espaloietan zain zeuden herritar ugarik mobilizazioarekin bat egin ostean, eta, esaterako, manifestazioaren buruak Plaza Eliptikoa gainditu eta Kale Nagusia hartu duenean Plaza Zirkularrerako bidean, oraindik bazegoen jendea manifestazioaren abiapuntuan. Plaza Zirkularrean, berriz, osasun langileak egon dira, Osasun langileak palestinar erresistentziarekin goiburua zuen pankarta batekin. Manifestariak hara iritsi direnean, zuriz jantzitako zenbait lagunek performance bat egin dute, eskuetan panpinak zeramatzatela, Israelgo armadaren erasoaldien ondorioz hildako umeak gogorarazteko. Plaza Zirkularretik Buenos Aires kalea hartu du manifestazioak, udaletxerako bidean. Udaletxeko zubian, odol orbanez tindatutako Israelen ikur bat paratu dute zenbait ekintzailek zoruan. Manifestariak ikurraren gainetik pasatu dira, eta handik gutxira txikituta gelditu da. 13:30ean iritsi da manifestazioa udaletxera, eta handik minutu gutxira hasi da ekitaldi politikoa. Manifestariek udaletxe aurreko esparru osoa eta zubia bete dute. Udaletxeko balkoietatik bengalak piztu eta beste bi pankarta zabaldu dituzte antolatzaileek, Gora palestinar erresistentzia eta Israelen kontra borrokatu esaldiekin. Suhiltzaileak, abokatuak, kirolariak… Iruñean, pankarta nagusiaren eta Palestinako bandera erraldoi baten atzetik, beste hainbatek osatu dute manifestazioa: Yala Nafarroa Palestinarekin elkartearena, irakasleena, abokatuena, suhiltzaileena, osasun langileena, kirolariena, ehun kazetari palestinar baino gehiago hil dituztela salatu duena, kirolariena… Genozidioa geratzeko eskatu dute, eta baita su etena eskatu ere. Palestina askatzeko eta Israeli boikot egiteko oihuak izan dira entzunenetakoak. 12.000 lagun elkartu dira, antolatzaileen arabera. Antolatzaileen izenean, Lidon Sorianok, Yala Nafarroako ekintzaileak, nabarmendu du gobernuak behartuta daudela nazioarteko ebazpenak betetzera: «Ez betetzera bakarrik, baita nazioarteko zuzenbidea betearaztera ere, eta betetzen ez duenari zigorrak jarri behar zaizkio». Gogoratu du Nazioarteko Justizia Auzitegiak eta Nazio Batuen Erakundeak adierazi dutela Israelen erasoen kontra daudela. «Israel zigortu behar da. Israelekin harremanak eten behar dira. Israel bakartu behar da, legeak behartuta». Baina gaur egungo egoeran gobernuek Israel ez dutela zigortzen ikusita, manifestazioa antolatu dute «Duela urtebete ez zen ezer hasi: badira 76 urte Israel erasoan ari dela; ez orain bakarrik, eta ez Palestinari bakarrik, baita Libanori eta Siriari ere; hala, gerraren globalizazioa bilatuz, egoera horretan eroso sentitzen baita», Sorianoren esanetan. Iruñeko manifestazioaren burua. IÑIGO URIZ / FOKU Palestinak bere burua babesteko eskubidea duela gehitu du, herrialde okupatua delako, eta Nazio Batuen Erakundeak eskubide hori aitortzen duela. Israelek, ordea, ez duela defentsa legitimorako eskubidea: «Defentsa legitimoak hiru premisa ditu: proportzionaltasuna, berehalakotasuna eta helburu zibilak eta militarrak bereiztea. Israelek ez du halakorik betetzen sistematikoki». Israel hiltzaile, Europa babesle, oihukatu dute. Carrefourren denda baten paretik pasatu direnean, mezua moldatu dute: Israel hiltzaile, Carrefour babesle. Israelen kontrako zigorrik ez dela ikusten oihukatu dute, Israel «estatu terrorista» dela; Palestinarena, ordea, ez dela «terrorismoa», erresistentzia baizik. Gogoratu dute Israelek bonbardatzen dituenak ospitaleak direla, ez direla militarren egoitzak.

Libanoko hegoaldean eta Beirut hirian eraso ugari egin ditu Israelgo armadak azken asteetan. Harago joan da gaur, eta herrialdearen iparraldeko Tripoli hiriari airez egin dio eraso. Hezbollahren eta Israelen arteko 2006ko gerratik, ez zuen hiri hori bonbardatu Israelgo armadak. Lau lagun hil dituzte erasoan, tartean Hamasi lotutako Al-Qassam Brigadetako buruzagi bat. Israelgo armadak zein Hamasi lotutako hedabideek baieztatu dute heriotza. Errefuxiatu palestinarren Beddawi kanpalekuaren alboko eraikin bati egin diote eraso; Beirutetik iparraldera, 90 kilometrora dago gune hori. Libanoko Gobernuaren arabera, jada 2.000 hildako baino gehiago eragin dituzte Israelgo armadak azken asteetan Libanon egindako erasoek. Herrialdearen iparraldean egindakoaz gainera, Beiruten eta Libano hegoaldean ere bonbardaketak egiten jarraitu du Tel Avivek. Atzo, Beirut hegoaldeko Dahieh auzoan eginiko eraso batean, Israelgo armadak Hezbollahko miliziano Haxim Safi al-Din hil nahi izan zuen, Israelgo hedabideen arabera. Iragan ostiralean hil zuten Hezbollahko buru Hassan Nasrallah, eta haren lekukoa hartzeko hautagai nagusietako bat da Safi al-Din. Bada, gaur, Al-Jazeera hedabideak, Libanoko iturri ofizialak aipatuz, jakinarazi du Hezbollahk ez duela Safi al-Dinen berririk atzotik. Libano hegoaldean, Israelgo soldaduek eta Hezbollahko milizianoek borrokan jarraitzen dute. Gaur, Irlandako Errepublikako presidente Michael D. Higginsek salatu du Israelek Unifil NBE Nazio Batuen Erakundearen Libanorako misioari alde egiteko eskatu diola —Irlandako 300 militar baino gehiago daude misio horretan—. Ohar batean salatu du Israelgo armadak «mehatxatu» egin duela misioa, eta eskatu dietela «babesten dituzten guneak uzteko». Unifilek Libanoren eta Israelen arteko mugan jarduten du; Israelek lurreko erasoak hasi zituenean, bertan jarraituko zutela ziurtatu zuten ohar baten bidez. Libanokoa, baina, ez da Tel Avivek zabalik duen fronte bakarra. Iragan asteartean, Iranek berrehun misil inguru jaurti zituen Israelera; gehienak lurra jotzerako suntsitu zituzten Israelgo armadaren defentsa sistemek. Ordutik, Israelen erantzunaren esperoan dago nazioartea, hala iragarri baitzuen Tel Avivek. Gaur, The Times of Israel egunkariak, iturri militar bat aipatuz, jakinarazi du Israelgo armada erantzun «serioa eta esanguratsua» prestatzen ari dela. Teheran, lasai Iranek, aldiz, ez du kezkarik adierazi balizko erasoaren harira; ez, behintzat, Irango Petrolio ministroak. Hitz hauek aipatu ditu gaur Tel Aviven balizko erantzunaz galdetuta: «Ez nago kezkatuta». Petrolio Ministerioaren Shana berri agentziak eman du esandakoen berri. Aurreko egunetan, nazioarteko hedabide ugarik aipatu dute Israelek Iranen petrolio azpiegiturei eraso egiteko aukera. AEB Ameriketako Estatu Batuetako presidente Joe Bideni ere galdetu zioten aukera horren inguruan, eta Tel Avivekin «hitz egiten» ari zela baino ez zuen erantzun. Bestalde, gaur, Irango Atzerri ministro Abbas Araghtxi Damaskon izan da. Siriako presidente Baxar al-Assadekin zein Atzerri ministro Baxam al-Sabbagh batzartu da, eta bi herrialdeen arteko «lankidetza» indartzearen garrantziaz aritu dira; horrela, nazioarteko laguntza mobilizatu eta Israel Gazan egiten ari den «genozidioa» zein Libanoko erasoa geldiarazteko. Hala jakinarazi du Irango Atzerri Ministerioko bozeramaileak, X sare sozialean. Araghtxi, Siriara joan aurretik, Beiruten izan zen atzo. Libanoko Gobernuarekin izandako elkarrizketen berri eman du gaur Damaskon. Libanon su etena lortzeko «ekimena» badagoela jakinarazi du, baina Israelen jarrera gaitzetsi du: «Zoritxarrez, erregimen sionistaren etsaitasunek eta krimenek jarraitu egiten dute». IRNA Irango Berri Agentzia Nazionalak jaso ditu adierazpenak. Behin bilerak amaituta, Araghtxik, X sare sozialean aurrez Teheranek esandakoa gogorarazi du: Israelek Irani eraso egiten badio honen erantzuna «are eta gogorragoa» izanen dela. macronek eskatu du israeli armarik ez bidaltzeko Israelek Gazako oldarraldia are eta gehiago gogortu zuela urtebete betetzear den honetan, Frantziako presidente Emmanuel Macronek uste du lehentasuna «soluzio politikoa» lortzea dela. Horregatik, Israelek «Gazan erabiltzen dituen» armak bidaltzeari uko egin behar zaiola adierazi du Frantziako presidenteak France Inter irrati katean egindako elkarrizketan. Frantziak Tel Aviv ez duela armaz hornitzen ziurtatu du, eta dei egin die gainerako herrialdeei horretan bat egin dezaten. Gainera, jakinarazi du IOF Frankofoniaren Nazioarteko Erakundeko 88 herrialdeek Libanorako «berehalako» su etena eskatzea adostu dutela. IOF erakundeko kide dira, besteak beste, Frantzia, Kanada, Suitza, Belgika, Egipto zein Maroko. Bitartean, Israelgo armadak Gazako zerrendan erasoak egiten jarraitzen du. Al-Jazeera hedabideak jakinarazi du, Gazako iturri ofizialak aipatuz, gutxienez 25 hildako eragin dituztela gaur Tel Avivek egindako bonbardaketek.