Gaur goizean 56 urteko gizonezko bat hil da Tuteran (Nafarroa), bizitoki zuen furgonetak su hartu izanaren ondorioz. Kalean zegoen ibilgailua. 9:00ak aldera sutea itzaltzera bertaratu dira suhiltzaileak eta Foruzaingoa, baina ezin izan dute ezer egin gizonezkoaren bizia salbatzeko. Acudimos por aviso de una furgoneta ardiendo en Tudela. Persona fallecida en el interior. Policía judicial investiga las causas y la identidad de la persona. Acuden patrullas de Protección y Atención Ciudadana y Grupo de Policía Judicial. Comisaría de Tudela. Acuden @bomberos_na pic.twitter.com/5oFk5OYEr1 — Policía Foral – Foruzaingoa (@policiaforal_na) January 25, 2026 Polizia gertatutakoa ikertzen ari da, baina, momentuz, ez du azaldu zerk eragin duen ezbeharra.

Balaztarik gabe, goitik behera ziztu bizian doa Athletic. Joan den asteazkenean Txapeldunen Ligan Atalantari 2-3 irabaztea mugarria izan zitekeela pentsatzen zuten askok, baina azkar egin dute jauzi errealitatera zuri-gorriek. Beste behin, gaizki eta bururik gabe jokatu dute, eta merezita geratu dira punturik gabe Sevillan. Robert Navarroren gol bati esker aurrea hartu du Ernesto Valverderen taldeak, baina ez du asmatu aldeari eusten. Huts larriegiak egin ditu, eta garesti atera zaio. Batez ere, Yurik sartu du hanka. Bigarren astez jarraian, penalti inozo bat egin du eskuarekin, eta etxekoek ez dute barkatu penalti puntutik. Lehia berdintzeko minutuak izan dituzte bizkaitarrek, baina gaitasunik ez. Irudi kezkagarria eskaini du Athleticek, eta zulora hurbiltzen ari da pixkanaka. Sei partida daramatza ligan irabazi gabe, eta gero eta gertuago ditu jaisteko postuak. Hasierako hamaikakoak berak azaldu du ondoen partidari berebiziko garrantzia eman diola Valverdek. Atseden hartzeko aukerarik gabe, ohiko hainbat jokalari zelairatu ditu, baina erasoan izan da berritasun bat: Urko Izetarena. Denboraldi honetan lehen aldiz, hasieratik jokatu du aiarrak, eta partidari ongi ekin dio Athleticek. Lehia handia nabaritu da zelai erdian bi taldeen artean, baina zuri-gorriek asmatu dute etxeko taldearen presioa gainditzen. Horri esker, erraz heldu dira Sevillaren areara. Nagusi izan da hasieran Valverderen taldea, baina Sevillak izan du lehen gol aukera garbia. Oso garbia ere. Hamaikagarrenez, huts larria egin dute Vivianek eta Paredesek elkarren artean, eta Adamsek ez du asmatu buruz burukoan Unai Simonen aurrean. Bikain aritu da atezaina. Gol aukera horrek konfiantza eman dio Sevillari, eta berdindu egin da lehia hurrengo minutuetan. Joan-etorriko jokoan murgildu dira bi taldeak, eta Ruiz de Galarretak oso gertu izan du gola 12. minutuan. Vlachodimosek sekulako akatsa egin du baloia urruntzeko garaian, eta, atea hutsik zegoela, horixe baliatzen saiatu da erdilaria. Baloia ozta-ozta joan da kanpora zutoin ondotik. Minutu luzez nor baino nor gehiago aritu dira Athletic eta Sevilla, baina minutuek aurrera egin ahala, nagusitzen hasi da etxeko taldea. Besteak beste, 22. minutuan gola sartu du Gudeljek, baina epaileak bertan behera utzi du, errepikapena ikusi ondoren. Jokaldi arriskutsua egon dela iritzi dio. Kontzentrazio eta intentsitate arazoak izan dituzte zuri-gorriek, eta sufritzea egokitu zaie. Hots, okerrenen pasatzen ari zirenean 0-1ekoa iritsi da, 42. minutuan. Ezker hegaletik jokaldi txukuna osatu dute Berenguerrek eta Yurik. Azken horrek azpi-azpitik erdiratu du, Izetak nola hala egin du errematea, eta baloia negarrez zegoela, Robert Navarrok sartu du 0-1ekoa. Atalantaren aurka jokalaririk onena izendatu ondoren, erdilariak berriro erakutsi du bere maila beste egun batez. Ziurrenik, merezi baino gehiago lortu du gol horrekin Valverderen taldeak, baina pozak ez dio askorik iraun. Izan ere, hurrengo jokaldian egin du banakoa Sevillak. Bekatu galanta egin du Sancetek, zelai erdian baloi arriskutsua galduta. Gehiegi eutsi dio baloiari oinetan, aurkariek ez diote barkatu, eta bizpahiru pasetan gola egin du etxeko taldeak. Peque izan da golegilea. Atsedenaldira bitarte 0-1ekoari eutsi izan balio asko izango zuen irabazia Athleticek, Sevillari urduritasunak eragingo ziolako, baina batere sendotasunik ez dute erakutsi zuri-gorriek. Aldaketa hirukoitza Lehen zatia txarra izan bada, are okerragoa izan da bigarrena. Bi taldeek errespetua izan diote elkarri hasieran, inork ez zuelako punturik galdu nahi, baina Yuriren opari batek aldatu ditu kontuak. Batere beharrik gabe, bi besoak nabarmen luzatu ditu jokaldi batean, eta baloiak eskuan jo dio. Penalti argia izan da, eta Adamsek ederki engainatu du Unai Simon 2-1ekoa egiteko. Bigarren astez jarraian hanka sartu du atzelariak. 2-1ekoari buelta eman nahian, aldaketa hirukoitza egin du Valverdek, eta Nico Williams, Unai Gomez eta Asier Hierro zelairatu ditu. Gerora Nico Serrano eta Vesga ere sartu dira, baina alferrik. Batere sakontasunik eta sormenik ez du izan taldeak, eta gol aukera garbirik ere ez du sortu berdinketa egin ahal izateko. Txapeldunen Ligan pentsatzea tokatzen da orain, baina ligan egoera gero eta kezkagarria bihurtzen ari da. Sevilla-Athletic Sevilla. Vlachodimos; Sanchez, Carmona, Gudelj (Manu Bueno, 73. min), Kike Salas, Suazo (Oso, 57. min); Agoume, Sow (Castrin, 46. min), Peque (Ejuke, 80. min); Isaac Romero (Joan Jordan, 80. min) eta Adams. Athletic. Unai Simon; Areso, Vivian, Paredes, Yuri; Ruiz de Galarreta (Unai Gomez, 57. min), Jauregizar (Vesga, 72. min); Robert Navarro (Nico Williams, 57. min), Sancet (Nico Serrano, 77. min), Berenguer; eta Izeta (Hierro, 57. min). Golak. 0-1: Robert Navarrok (40. min). 1-1: Pequek (42. min). 2-1: Adamsek, penaltiz (56. min).

Herrera auzoko Zardoya Otis eremuan dauden pabiloi eta eraikin guztiak hustu nahi ditu Donostiako Udalak, eta Jolastokietako 4. pabiloia izanen da lehena, heldu den astelehenean. Horren ondorioz, han bizi diren 30 bat pertsona kale gorrian geratuko dira. Hori salatu dute zenbait gizarte eragilek, gaur egin duten elkarretaratzean. Protestaren antolatzaileen esanetan, Herrerakoa ez da kasu bakana: «Donostian gero eta ohikoagoa da etxegabetzeak modu azkar eta isilean gauzatzea, pertsonen egoera soziala edo ekonomikoa kontuan hartu gabe, eta benetako alternatibarik eskaini gabe. Horren adibide argia da iazko abenduan Martutenen gertatutako etxegabetzea», azaldu dute. Gaineratu dutenez, etxegabetze data jarrita zegoela argudiatuta, han bizi diren pertsonei ez diete doako justizia eskatzeko aukerarik eman. «Horrek, praktikan, pertsona hauei beren burua juridikoki defendatzeko eskubidea ukatzea dakar, eta berriro ere agerian uzten du sistemak baliabide ekonomikorik ez duten pertsonak zein zaurgarri uzten dituen». Jolastokietako 4. pabiloia ez da eraitsi asmo duten bakarra: «Zardoya eremuan dauden bost eraikinak husteko aginduaren zain daude, eta horrek lehenago edo beranduago berrehun pertsona inguru kalean gelditzeko arriskua areagotzen du, inolako alternatiba errealik gabe», salatu dute protestaren antolatzaileek. Udalari «konponbide erreal bat» eskatu diote pertsona horientzat guztientzat.

Minneapolisen (AEB) ICE Immigrazioko eta Aduanetako Polizia Indarreko agenteek 37 urteko gizon bat hil dute gaur, tiroz. Minnesotako hiriburuan hiru astean hil duten bigarren pertsona da. Hain zuzen, ICEko agenteen indarkeria eta sarekadak salatzeko egindako greba orokorraren biharamunean gertatu da bigarren hilketa. Minnesota estatuan Immigrazioko Polizia egiten ari den lana txalotu eta txalotu aritu da asteon Donald Trump presidentea, Etxe Zurira itzuli zenetik urtebete igaro zela-eta emandako hitzaldian: milaka «gaizkile» atxilotu dituztela, atzerritik etorritako jende «arriskutsua» kanporatzen ari direla… Etxe Zurian elkartutako kazetarien aurrean, ordea, ez zion garrantzi handirik eman urtarrilaren 7an Minneapolisen jazotakoari. Orduan, ICEko agenteek Renee Nicole Good 37 urteko emakumea hil zuten tiroz, eztabaida bat izan ostean. Ez zuen aipatu hiri berean ICEren indarkeria salatzeko protestetan gizon bati hanka batean emandako tiroa, eta hitzik ez asteon agente horiek Texasen atxilotu duten 5 urteko haurraren inguruan ere. Horren guztiaren harira, atzo greba orokorrera deitu zuten Minneapolisen; ehunka saltoki itxi zituzten, eta milaka herritar atera ziren protestan. Gaur, baina, ICEko agenteen beste indarkeria kasu baten berri izan dute Minneapolisen. Albistea zabaldu eta segituan poliziei aurre egin diete dozenaka herritarrek. Facebook sare sozialean zabaldu da hilketaren bideoa. Polizia batekin eztabaidan ari da gizona, eta beste hainbat agentek inguratu eta lurrera botatzen dute. Lurrean jo ostean, agente batek hainbat tiro egin dizkio. 2025eko uztailetik hona, ICEko 2.000 polizia baino gehiago zabaldu ditu Trumpen administrazioak Minnesotan, eta azken asteetan sarekadak areagotu ditu estatu horretan. Horrek Minnesotako gobernu demokrataren haserrea eragin du. Eta gaurko gertakariaren ostean honako adierazpen hauek egin ditu Tim Walz gobernadoreak sare sozialetan: «Etxe Zuriarekin hitz egin berri dut. Higuingarria da. Presidenteak operazioa geldiarazi beharra dauka. Atera ditzatela Minnesotatik prestakuntzarik ez duten milaka agente biolento hauek. Orain bertan!». Trumpen administrazioaren arabera, ICEko agenteak «legez kanpoko migrante bat» atxilotzera bidean zirela gizon bat agenteengana hurbildu da. Eta, Segurtasun Departamentuak zabaldutako ohar baten arabera, gizonak arma bat zeraman soinean. Horregatik egin zioten tiro. Minneapolisko Poliziak argitu du gizonak armak edukitzeko baimena zuela.

Epaileak inputatu egin ditu Getxoko Udaleko (Bizkaia) EAJko hiru zinegotzi: bi delitu egozten dizkie Irurak Bat jauregi historiko eta babestua eraisteko prozesuarekin lotuta, El Correo egunkariak zabaldu duenez. Ignacio Uriarte, Irantzu Uriarte eta Iñigo Urkitza dira zinegotziak. Udaleko hiru teknikari ere inputatu ditu: udaleko Hirigintza Saileko bi goi kargudun eta arkitektoa. Hiru zinegotziek alderdiaren eskuetan utzi dute beren kargua, EAJk jakinarazi duenez. Zinegotziek berretsi dute errugabeak direla, baina uste dute egokiena kargua uztea dela, beren defentsa errazteko eta alderdiaren irudi publikoa zaintzeko, EAJren oharraren arabera. Hurrengo egunetan ordezkatuko dituzte. Amaia Agirre Getxoko alkatea atzo bertan bildu zen hiru zinegotziekin. Nabarmendu zuen inputatuta egotea ez dela zigortuta egotea. Onartu zuen eguna «oso gogorra eta oso zaila» izan dela. «Arduraz lan egin dugu, eta hala jarraituko dugu, baita justiziari laguntzen ere», gehitu zuen alkateak. XIX. mendeko jauregia zen Irurak Bat, 1845. urtekoa, eta legez babestuta zegoen. Baina 2024ko abuztuan eraitsi egin zuten luxuzko hamabi etxebizitza eraikitzeko. Biurban etxebizitza kooperatibak eraitsi zuen, eta bertako kide dira udaleko EAJko bi zinegotzi: Irantzu Uriarte eta Ignazio Uriarte. Getxoko 2. Instrukzio Epaitegiak ondarearen kontrako delituaren zantzuak ikusi zituen, eta ikerketa abiatu zuen. Ondarearen kontrako bi delitu egotzi dizkie hiru zinegotziei, Bizkaiko egunkariaren arabera: alde batetik, «agintariak edo funtzionario publikoak izanda, bidegabekeria dela jakinda, babes berezia duten eraikinak botatzearen edo hondatzearen alde egitea»; bestetik, interes historikoagatik babestutako eraikinak hondatzea. Administratzaileak eta arkitektoak Bigarren delitu horregatik beste lau lagun ere inputatu ditu, eraikin historikoa eraistearekin zerikusia izan zutenak: bi zinegotziek parte hartu zuten sozietatea sortu zuen erakundearen administratzailea, eraikuntza enpresako administratzailea, proiektua egin zuen arkitektura estudioko arduraduna eta eraistean parte hartu zuen arkitekto bat. Udalak egindako txosten tekniko baten arabera, 730.000 euro irabazi zituen jauregia eraisteaz arduratu zen enpresak. Eraikin historiko hura berritzea 3,2 milioi kostatuko zen, eta eraitsi ostean berriz eraikitzea, 2,5 milioi. Horrenbestez, ondorioztatu zuten enpresak 730.000 euro aurreztu zituela eraikin historiko hura modu irregularrean eraitsita. Miaketa iragan astean Auziak oihartzun handia izan du urte hasieran, iragan asteko asteazkenean Ertzaintza Getxoko Udaleko Hirigintza, Herri Lan eta Ingurumen Bulegora sartu zelako, jauregiaren eraistea ikertzeko. Irantzu Uriarteren eta Ignazio Uriarteren bulegoak miatu zituzten. EAJk eta PSE-EEk agintzen dute Getxon. Iazko azaroan onartu zuen eraiste horrek ez zituela bete emandako lizentziaren baldintzak, ez zelako hura botatzeko baimenik eman. Ertzainak udalean sartu eta egun batzuk geroago Iñigo Ansola BBB Bizkai Buru Batzarreko presidenteak esan zuenez, ordura arteko informazioetan oinarrituta ez zuten ikusi «irregulartasunik eta etikarik gabeko jokabiderik» alderdiaren zinegotzietan. Kontrakoa: ziurtatu zuen prozedura administratiboek «berme guztiak» izan zituztela, legea bete zutela eta zinegotziek errugabetasun presuntzioa dutela. EH Bilduk albistea jakin eta gero jakinarazi du «arreta handiz» erreparatuko diotela ikerketa judizialari. Berretsi du kudeaketa publikoan ahalik eta eredugarritasunik handiena izan behar dela, «ustelkeriarik gabea».

«Gaur gertatutakoa ez da kasu bakana. Etxebizitza negozio bihurtu duten espekulatzaileen ondorio zuzena da. Jabetzak bizitzen gainetik jartzen dituztenen ondorioa». Emakume bat eta haren bi seme-alabak —horietako bat adingabea— etxegabetu dituzte gaur Donostiako Gros auzoan, eta gogor salatu du Saretxe sindikatuak. Esplikatu duenez, etxebizitza Azora putre funtsaren jabetzakoa da, eta enpresak demanda jarri zion familiari, bi hilabeteko errenta gibelapenagatik: «Zorra ez zuen familiak sortu, etxean bizi ez zen beste pertsona batek baizik, eta, hala ere, familiak bere gain hartu eta ordaindu egin zuen. Prozesu judiziala hasi zenerako zorra kitatua zegoen arren, aurrera jarraitu zuen prozesuak». Joan den astean alternatiba bat lortu zuen familiak. Iluntzean agerraldia egin dute sindikatuko kideek, eta salatu gaurkoa bezalako «isilpeko kaleratzeak» nagusi izan direla «Donostiak Azorarekin duen gatazkan». «Putre funtsak, espekulatzaileak diren heinean, eskura dituzten tresna guztiak erabili ditu urte hauetan auzotarrak kaleratzeko, dela alokairuak igoz, dela zuzenean epaitegietara joz, baina beti jabetza pribatuaren defentsan eta etxebizitza eskubidearen kalte», erran dute sindikatuko kideek. Hala, salatu dute gaur kaleratutako familiaren ezjakintasunaz baliatu zela Azoraren abokatua, erran baitzien etxegabetzea bertan behera utziko zutela. Gauzak horrela, epaiketara ez zen inor aurkeztu, baina epaileak erabaki du etxegabetze prozesuan aurrera egitea, sindikatuak azaldu duenez. Saretxek etxegabetzea bertan behera uzteko galdegin bazuen ere, epaitegiak ez du eskaria onartu, «alokairu kontratuak dituen irregulartasunen ondorioz». Horrez gain, sindikatuak adierazi du etxe agentziekin harremanetan egon direla, eta, «etengabe beste kontratu baten promesa» egin dieten arren, ez dutela errandakoa bete. Egoera horretan familiak erakutsi duen erresistentzia txalotu du Saretxek, eta «eredugarria» dela azpimarratu. «Gaurkoan, atarian erresistentziarik egin ez dugun arren, egunerokoan ari gara erresistentzian: aholkularitzak, salaketak, grebak egiten eta elkartasuna antolatzen», erran dute. Halaber, gogoratu dute sindikatuko bertze bi familia etxegabetuko dituztela, eta horiek ere Azoraren jabetzakoak diren etxebizitzetan bizi direla. Antolakuntzarako deia Hain zuzen, etxegabetze aginduak dituzten bertze bi familiak hiriburuko Amara eta Gros auzoetan bizi dira; sindikatuak hilaren 10ean egindako prentsaurrekoan zabaldu zuenez. Are, Saretxeren erranetan, Azora funtsaren kontrako borrokan «buru-belarri» ari dira familia horiek, «gehiegikeriak salatzen, alokairu greba partziala egiten eta auzokideen arteko elkartasuna antolatzen». «Bizilagunen antolaketak urduri jartzen du Azora, eta, bere interesak arriskuan ikusi dituenean, familiak are gehiago estutzea besterik ez zaio geratzen. Horren adibide dira antolatuta dauden bizilagunen kontrako etxegabetze aginduak, oraindik aurrera baitoaz», adierazi dute gaurko agerraldian. Sindikatuak behin eta berriz gogoratu du etxebizitzaren gatazkak ez dituela berdin zeharkatzen gorputz guztiak, eta «gizarte kapitalista zeharkatzen duten beste zapalkuntzek ere» eragina dutela etxebizitza lortzeari dagokionez. Arrazakeria aipatu dute adibide gisa: «Etxebizitzaren arloan pairatzen duten arrazakeriaren ondorioz, familia hauek guztiak baldintza txarretan bizi dira, beste alternatibarik gabe». Horren aurka antolatzera eta mobilizatzera deitu dituzte herritarrak. Izan ere, bertze bi etxegabetzeak gelditzeko «bide luzea» dutela azaldu dute, baina sinetsita daude merezi duela borrokatzea eta soilik antolakuntzaren bidez lortzen dela etxegabetzeak gelditzea. «Egoera honetan dagoen oro gonbidatzen dugu sindikatura batzera eta antolatzera. Haien jabetzak ala gure bizitzak, ez dago erdibiderik», borobildu dute.

Hilaren 26a. Egun horretarako hustu nahi ditu Donostiako Udalak Herrera auzoko pabiloiak. Donostiako Etxebizitza Sindikatu Sozialistak jakinarazi duenez, berrehun pertsona baino gehiago bizi dira bertan, eta ez dute «etxebizitza alternatibarik». Sindikatuak azaldu duenez, «beste aukerarik gabe geratu ondoren, abandonatutako eraikinetan babesa» aurkitu zuten herritarrak bizi dira pabiloi horietan. Are, Martuteneko eskola zaharra hustu ondoren dozenaka herritar batu zitzaizkien. Sindikatuak «dinamika zabalago» baten barnean kokatu du Herrerako hustea: «Bilboko Zorrotzaurre auzoan laurogei lagun kanporatu zituzten irailean, eta Tolosan udalak hamarnaka pertsona kaleratu ditu arkupe batzuetatik». Hala, instituzio publikoak eta horien politikak seinalatu ditu sindikatuak, eta erran «irabazi ekonomikoa langile klasearen beharrizanen gainetik lehenesten» dutela. «Ehunka pertsona bortizki kanporatzeko milaka euro gastatzeko aukera dago, baina ez dute euro bakar bat ere jartzen kalitatezko baldintzetan birkokatzeko», adierazi dute. Sindikatuak EAJri eta Donostiako alkateari zera leporatu die: «Segurtasunaren eta bizikidetzaren aitzakian, etxebizitzaren arazoa desitxuratzen duen marko erreakzionarioa bere egitea». Marko horrek, sindikatuaren irudiko, «langile klaseko sektore pobretuenen artean konfrontazioa elikatu eta instituzio indarkeria normalizatu» bertzerik ez du egiten. Salatu dute helburua langile sektoreak «elkarren aurka» jartzea dela, baina, horren kontra, sindikatuak «elkartasuna zabaldu eta etxebizitzarako eskubidea defendatuko» dituela. «Denontzat kalitatezko bizi baldintzak bermatu daitezke, auzoak hobetu daitezke eta kaleratzeak behin betiko geldiarazi», borobildu dute.

Ukrainako presidente Volodimir Zelenskik gogor kritikatu du Europako liderrek munduko azken gertakizunen harira erakutsi duten jarrera. Urtero Davosen egiten den Munduko Ekonomia Foroan hitz egin du Zelenskik, eta gogor egin du Europaren aurka, «desafioz» betetako mundu batean «nagikeriaz» ari delakoan. «Europak oso gustuko du etorkizunaz eztabaidatzea, baina ez du neurririk hartu nahi, eta neurri horiek definitzen dute zer etorkizun izango dugun. Hori da arazoa», adierazi du. Zelenskiren esanetan, «Europa mugitzen den baino azkarrago» mugitzen dira munduan gertatzen ari diren gauzak. Hori ikusita munduan ordena berri bat lortzeko Europako liderrek zerbait egin behar dutela nabarmendu du, eta ohartarazi hori ezin dela soilik hitzen bidez lortu. «Europak mundu hobe bat eraikitzen lagundu dezake, baina, horretarako, indarra behar du». Ukrainako presidentearen esanetan, europarren pentsamoldea arazo bat da munduko azken gertakizunei aurre egiteko. Izan ere, Zelenskiren ustetan, Europako liderrek ez dituzte beti Europaren «benetako interesak» defendatzen. «Europa potentzia txikien eta ertainen kaleidoskopio eder bat da, baina zatituta dago». Zatidura hori amaitu behar dela gaineratu du Zelenskik, eta Europaren defentsan jarri du begirada. Ukrainako presidentearen esanetan, Europak «indar armatu bateratuak» behar ditu kontinentea defendatzeko, baina gogor egin du NATO Ipar Atlantikoko Itunaren Erakundearen aurka, eta esan du inork ez duela aliantza «akzioan» ikusi. «NATO sinetsita dago edozein gauza gertatzen denean AEBek parte hartuko dutela, ez dutela alde batera egingo, eta lagundu egingo dutela. Baina, eta halakorik egiten ez badu?», galdegin du. Iazko ekitaldian esan zituen hitzak ekarri ditu gogora Zelenskik. «Europak bere burua nola defendatu behar duen jakin beharra dauka», esan zuen orduko hartan; «baina urtebete igaro da, eta ezer ez da aldatu», salatu du gaur. Kiev, baikor AEBetako presidente Donald Trumpekin ordubete inguruan bilduta egon ostean hitz egin du Ukrainako presidenteak jendaurrean, baina ez berak eta ez Trumpek ez dute hizketaldiaren inguruko xehetasunik eman. Zelenskik adierazi du «positiboa» izan dela bilera, eta jakinarazi du asteburuan lehen aldiz bilduko direla Ukraina, AEBak eta Errusia, Arabiar Emirerrietan. Ez du zehaztu herrialde bakoitzak zer ordezkari izango duen bilera horretan, baina Ukrainako ordezkariak bertan egongo direla adierazi du. Hala ere, zalantzan jarri du Errusiako presidenteak gerra amaitu nahi izatea. Errusia eta Ukrainaren artekoari dagokionean, gogorarazi du Bigarren Mundu Gerraz geroztik Europan egon den gerrarik handiena izaten ari dela eta, hala ere, gerra hori abiatu zuen pertsonak libre daudela oraindik. «Maduro New Yorken epaitzen ari dira. Inor ez da Putin epaitzen ari, eta, gainera, Europak blokeatu dizkion aktiboak berreskuratzen saiatzen ari da», salatu du. Era berean, gogorarazi du hainbat herrialdek konpromisoa hartu zutela Errusiaren gerra krimenak epaituko zituen epaitegi berezi bat sortzeko, eta salatu du oraindik ez dutela «aurrerapen nahikorik» egin hori indarrean jartzeko: «Europan beti dago justizia egitea baino premiazkoagoa den beste zerbait; gehiegitan gertatu da». Horrez gain, Zelenskik nabarmendu du gerra amaitzekotan Ukrainak «segurtasun berme sendoak» behar dituela eta AEBek Ukrainarako segurtasun bermeen gainean egindako dokumentua «amaituta» dagoela. Baina, argitu duenez, presidenteek agiria sinatu behar dute oraindik, eta bi herrialdeetako parlamentuetatik igaro beharko du gero.

Narkotrafikoaz puntua egin nahi izan du Pirinio Atlantikoetako departamenduko prefeturak gaur arratsaldean, Baionan. Datuak ematen hasi dira fite, eta azpimarratu dute 2025ean egin dutela inoizko droga bilketarik handiena, izan auzoetan edo bideetan: 7,4 tona kalamu atzeman dituzte, 2,1 tona kokaina, 163 kilogramo MDMA… Orotara, 184 milioi euroren baliokidea, drogetan. Horrekin batera, adierazi dute nabarmen gora egin duela trafikoak orokorrean, eta kokainarenak zehazki. Trafiko horren barnean denak sartzen dituzte: kanpotik salmentak kudeatzen dituztenak eta sareen eramaileak direnak, tokian-tokian salmenta sareak antolatzen dituztenak, leku jakin batzuetara droga eramaten dutenak edo «esku-ttipiak», eta, azkenik, kontsumitzaileak. Zehaztu dutenaz, ez da kasualitatea zenbakiek gora egitea: ekoizpenak gora egiten du beti, eta Europa biziki «merkatu begiztatua» da «Ameriketako ekoizleentzat». Lehen, droga Frantzia iparraldetik sartzen zen nagusiki, «baina orain geroz eta gehiago Atlantikotik», Espainia aldetik. Eta, ekoizpen eta erosketek gora egiten duten denbora berean, prezioak behera doaz. Joera horren arriskua azpimarratu dute prefeturako, Poliziako eta auzitegiko ordezkariek, prezioak merkeagoak izanda gazte gehiagok baitu erosteko ahalmena.

Aldatzen ari dira ikus-entzunezko edukiak eta hedabideak kontsumitzeko manerak, eta aldatzen ari dira, ondorioz, eduki horiek ekoizteko eta hartzaileei helarazteko moduak. Joera berrietara egokitzeko, EITBk webgune berri bat ondu du Kirolak atalerako. Ez da «webgune soil bat», Jon Balentziaga aurkezleak ohartarazi duenez gaur, EITBren Bilboko egoitzan egin duten ekitaldian —Olatz Foruria aurkezlearekin batera gidatu du saioa—. «Kirola ikusteko eta bizitzeko beste modu bat da». Atari berriak zuzeneko emanaldi gehiago eskainiko ditu; diziplina nagusiek ez ezik, hedapen gutxiagokoek ere beren leihoa izango dute; eta «modu berezian zainduko da emakumezkoen kirola». Webgune «intuitiboagoa eta ikus-entzunezkoagoa» taxutu dute, oro har. Aurkezleek gogoratu dutenez, EITBk joan den urteko urtarrilean sortu zuen Kirolak marka. Baina aspaldiago abiatu zituzten ahaleginak. Horretara «derrigortuta», eskaintza «birpentsatzeko» bide bat zabaldu zuten orain dela lau urte, Andoni Aldekoa EITBko zuzendari nagusiaren hitzetan. Argi dute zein den jopuntua. «Gazteekin bat egin nahi dugu: hori da EITBren estrategiaren ildo nagusia». Zuzendariaren arabera, telebistak eta irratiak herritar batzuengan baino ez dute eragiten dagoeneko: nagusiki, 50-55 urtetik gorakoengan. «Gure rola jokatzen segitu nahi badugu, ezin ditugu gazteak galdu: gazteak berriro lotu behar ditugu gure hizkuntzara —euskarara—, kulturara, herrialdera». Horretarako, digitalizazioa ezinbestekoa da. «Hori da gure obsesioa: 30 urtetik beherakoengana heltzea. Sarean edukiak kontsumituko dituzten milioi bat laguneko komunitatea sortu nahi dugu». Kolorearen garrantzia Kirolak dira bide orri horren lehentasunetako bat, Aldekoaren berbetan. Nabarmendu duenez, gehien kontsumitu diren ETB On plataforma digitaleko edukietan laugarrena da esku pilotako Binakako Txapelketa, eta gehien ikusi direnen artean dago, halaber, zesta-puntako Winter Series txapelketa. Gazteentzako erakargarria izan dadin, diseinu koloretsua baliatu dute kiroletako webgune berrian. Kirol bakoitzari tonu bereizgarria eman diote: arraunari, arrosa, «pasioa transmititzen duen kolorea», Balentziagaren esanetan; txirrindularitzari, urdina, «bidea eta distantzia sinbolizatzen» baititu, Foruriaren berbetan —nahiz eta lasterketa batzuk bestelako tonuekin jantziko dituzten: esaterako, arrosaz tindatuko dute Italiako Giroa, eta hori distiratsuz Frantziako Tourra—; herri kirolei, laranja, «kolore beroa, herri honen iragana, oraina eta etorkizuna irudikatzeko»; pilotari, grisa eta beltza, «tradizioa eta emozioa» uztartzeko —pilotako diziplina guztietako 250 emankizun baino gehiago ematen ditu kate publikoak urtean—; eta berde kolorearekin batuko dituzte gainontzeko diziplinak. «Gure rola jokatzen segitu nahi badugu, ezin ditugu gazteak galdu: gazteak berriro lotu behar ditugu gure hizkuntzara —euskarara—, kulturara, herrialdera» ANDONI ALDEKOA EITBko zuzendari nagusia Kirol horietan guztietan emakumeen presentziak izan duen gorakada azpimarratu dute, eta webguneak ere islatuko du bilakaera hori. Horrez gain, sakelakoetarako aplikazioa ere eskuragarri dago jada, eta Whatsapp zerbitzua ere izango dute laster. Galdera jakin batzuk daude EITB Kirolak-en webgune berriaren oinarrian, Amane Ibañez EITBko Kiroletako zuzendariordearen esanetan: «Kirolak nola bizi nahiko genituzke? Nola kontsumitzen ditugu kirolak gaur egun?». Haren berbetan, kontsumitzaileak daborduko ez dira egoten edukien zain, baizik eta bilatu egiten dituzte. «Gurea mundura zabaltzeko erabateko konpromisoa daukagu: euskaraz, euskararekin, mundu guztiarentzat», berretsi du Joseba Urkiola EITBko Kiroletako zuzendariak.